العميل بيشوف إيه لما يمسح الكود؟
المنيو الرقمية صفحة بتفتح في متصفح الموبايل. العميل يفتح كاميرا الموبايل، يوجّهها لكارت الـQR، ويضغط على اللينك اللي ظهر. لما يكون معاه لينك المنيو مباشرة من واتساب أو إنستجرام، يقدر يفتحه من الرسالة أو البايو.
جوا الصفحة بيلاقي اسم المكان وأقسامه، زي الساندوتشات والوجبات والمشروبات. حسب اللي ضفته، الصنف بيظهر باسمه وصورته ووصفه وسعره. لو عندك مقاسين لنفس الوجبة، يقدر يشوف سعر كل مقاس. ولو فعّلت الطلبات، يقدر يضيف اختياراته للسلة.
إيه اللي يحصل لما تغيّر سعر أو صنف يخلص؟
خلّينا نفترض إن عندك وجبة غدا اتغيّر سعرها قبل الشيفت. من «الأصناف» افتح «تعديل صنف»، وغيّر السعر تحت «الاختيارات والأسعار» واحفظ. اللي يفتح اللينك بعدها هيشوف السعر الجديد. لو المنيو كانت مفتوحة عنده قبل التعديل، اطلب منه يحدّث الصفحة.
لو وجبة الغدا خلصت، تقدر تضغط «ظاهر» في صف الصنف عشان يبقى «مخفي». أول ما يرجع متاح، اضغط «مخفي» عشان يظهر تاني. نفس كروت الـQR تفضل شغالة طالما عنوان المنيو اللي بيفتحه الكود هو نفسه.
فين تحط الكود في مكانك؟
لو العميل بيقعد الأول ويختار، حط كارت واضح على الترابيزة. لو بيطلب من الكاونتر، حطّه في مكان الزبون يقدر يشوفه وهو واقف في الطابور. اكتب تحت الكود «امسح بالكاميرا عشان تفتح المنيو»، وجرّبه في نفس إضاءة المكان.
لو حد معندوش إنترنت على الموبايل أو محتاج مساعدة، ممكن تبعت له اللينك لو هيفتحه لاحقًا، أو تخلي حد من الفريق يعرض المنيو على جهاز المكان.
لو حاجة وقفت معاك
الكاميرا قرأت الكود بس المنيو ما فتحتش؟
اتأكد إن الموبايل متصل بالإنترنت. افتح اللينك من «روابط ورمز QR» مباشرة. لو اللينك نفسه مش شغّال من متصفح خاص، راجع «نشر المنيو» وحالة الاشتراك من اللوحة.
اللينك بيفتح عندي وأنا مسجّل دخول، لكن العميل شايف رسالة خطأ؟
انسخ اللينك من «روابط ورمز QR» وجرّبه في نافذة خاصة. زر «معاينة المنيو» مخصص لصاحب الحساب، ولينكه فيه preview=1.
أطبع كارت جديد مع كل تغيير سعر؟
تقدر تستخدم نفس الكارت طالما عنوان المنيو نفسه. راجع الكروت المطبوعة لو غيّرت الدومين أو بطّلت تستخدم اللينك القديم.
